"Lu mo lo" oder: Es ist nicht alles Gold, was glänzt |
|
|
Alwis und Lisbeth treffen sich wieder einmal beim "Schääsen" im alten Dorfzentrum.
Nach einer Weile kurzsichtigen Fixierens erkennen sie sich und beginnen ein Gespräch
über das Neueste vom Tage, das aber wie gewöhnlich ein Gespräch über alte Zeiten wird
und eine peinliche Enthüllung mit sich bringt. Alwis: Lu mo lo! Lisbeth: Lu mo lo, da Alwis! A: Ei dass ich disch mol noch gesinn! Lebscht noch? L: Ei jo! A: Immer mit der Courasch, ett Lisbeth, gell. Ma duht, was ma kann! L: Wie eisch immer sahn: es muss halt gehn! A: Recht haschd. Unn sonscht? L: Oh, sonscht hann eisch nitt vill ze verzehlen, ma kemmt ja kaum noch ausem Haus raus, unn im Haus passiert halt aach nischt. Ah so, mei Schweschda hadd e nei Gebiss, dass is nei, awwa isch glaw, de Baschten Heinz hat dir das schon vazehlt... A:...jo, et soll wei noch schlimmer aussiehn wie sonscht. L: Ei wie? Sei moll net so grimmelwiedisch Alder, ett Kätt kann doch ach neischt davor unn kunnt nie eppes davor, watt soll datt denn jez mit denne beese Sprich, und dau wescht ach, ett sitt vielleischt nimme so doll aus wie als, awwer ett hatt immer noch e Härz aus Gold. A: Odder annerschd, ett Härz hängt am Gold, als wie je, na wei s´isch besser als wie datt Gebiss von Gold watt ess frieher gehabt hatt. L: Eisch wees nett, was du damit sahn willschdt. Mei gudd Schweschda und´t Härz hängt am Gold...ei sah mo, datt iss doch Kappes, wer hatt dir dann sowatt eingesetzt... A: Enngesetzt? Mei liew Lisbeth, soll ich dir moll der Reih noch uffzähle, wer mir das verzehlt hott? De Jänner Fritz, de Buschden Hannes, Backes Pitt, de Baschten Heinz sowieso, awwer off den kann ma net gehn, der iss ä Dummschwätzer- - L: --rischdisch, ä Dummschwätzer, ä ganz übler, isch menn, isch muss dem ach moll watt vortrahn, wenn der so üwwer mei Schweschda schwätzt, wo a doch gar nix wees... A: ...un weider noch de Sampretzen Louis, unn emm Louis sei nischtnotzig rodhoorich Bruder, de Schanpjer, unn mei alder Kollech Frieder vumm Friedrichhof in Laudern, der wo immer datt Bään so nochgezoh hott...wei fällt mer neischt meh ein, datt iss de Kopp, eisch vagess doch alles und die anner Häft kann eisch mir nimmer merken, awwer ett woren noch vill mehr. L: Budder bei de Fisch, Alwis, wei schwätz net drumrum! Isch mahn schon wisse, was die Leit da von meinem gudden Kätt gemennt hann. A: Ei...dass es hald...ä bissje zewill hinnerm Geld her iss... L: Kappes! Ett Kätt und "e bissje zevill vumm Geld halle". Eisch menn, wer nitt? Und was geht et die Leit iwwerhaupt ahn? A: Ei jo, eisch sahn jo nur, was die Leit sahn, unn eisch selwer hott jo neischt mittem Kätt ze duhn, ausser, dass ich ett mol aus der Kullang geholl han am Neijohrsmorjen...do hotten se Raket geschpillt unn et Kätt sollt de Böller sinn mit senner stämmisch Figur, awwer wei isch glaww, datt wor alles nur de Birnenschnaps vumm Baschten Heinz... L: Gewäsch! Jez geh doch fott mit dennem Heinz! Seit der do sei nei Gehirnpladde hat, duht er neischt wie dummschwätze de ganze Daach lang unn fantasieert do nei Geschichten, die wo ett nie genn hat. Heer mo besser net hin, eisch menn, der hott schon lang de Iwwerblick valor. A: Ei gudd, do lass isch de Baschten Heinz ausem Spill, doch ett bleiwt dabei, dass all die annern sahn, dei Schweschda...frieher, menn ich... L: ...wo se noch scheen wor... A: Ei wei, do kann eisch nischt sahn, wor dann ett Kätt mol scheen? L: Alwis! Alder Miesmacher! Datt kannscht grad du vunn keener sahn, du, wo de immer als eenziger ohne Kerz zum Fenschderl gang bischd, weil dei Freindin so furchdbar schroh wor. Mei Schweschda unn net scheen! Du muschd et jo wisse. Unn ob ett Kätt scheen wor! Et wor scheen for zwo. A: Jo, datt menn ich aach, awwer isch kann dich trotzdem gudd leiden. L: Nää, so hann eisch dat nett gesaht! Et wor ä scheen Mettchen, mollich und rund, unn ä paar kratzer Auen hatts gehabt. Wei iss ett ja fascht blind, awwer frieher hatt´s de Mannleid gudd gefall...Eisch wor manschmal rischdisch neidisch uffett Kätt, weil ett so Schlach hott. A: Sahn isch jo, bei allen hottet Schlach...unn so ganz arm isset net bei genn! L: Alwis, alde Grummelschneck, wei kannscht sahn, was de willschd: isch wees datt doch alles besser, et woor näsch so gewenn, und isch sahn dir, mei Schweschda hott Recht gehabt! A: Bidde? Du weescht dat alles, demm sei Treiwen frieher, unn datt et hier und ach mol was davor gehollt hat... L: Ei jo! Es wor halt pfiffijer als wie dei Frau, die hott wei nur alde Zigaredde kriet unn emol ä Poschtkart, do wo druffgestann hott: "Übung macht den Meister"! A: Isch bidde disch, so ä unnschullich Kaart, do hann isch doch gemennt, se wär vumm Landfrauenverein vumm Hägelkurs. L: Ei nää! Mir zwo hann die selwer geschriew, weil ett Kätt mit seiner sozialer Tour gemennt hatt, et iss net gerecht, datt es die Franken dovor kriet, von jeddem, der do wor, unn kann sich Straussefedderhiet und Pariser Schiggelscher kaafe fier sei Fieees unn newennaus geht een enzich anner traurich Figur renn und raus uns losst dem Mäde nischt wie alde Papirossi. A: Lisbeth, datt do mahn isch nitt glawe. L: Ei jo, so wie isch dei Babette in Erinnerung hann, mahn isch´s ach nitt glawe, awwer et wor halt so, emm Kriech iss ma nett so partiggelisch, unn mir hann hald was ausgleiche wolle mit derer Kaart und hann ach so gelachd darüwwer. A: S´is sechzich Johr her... L:...unn doch weescht du es noch, unn isch wees es och. A: Lu mo lo! |