"Als de Alwis noch knachich wor (unn es Lisbeth ach)" oder: Lisbeth sieht mehr

  Alwis sitzt auf seiner Lieblingsbank und widmet sich seiner Lieblingsbeschäftigung, dem "Sinnieren" und nostalgischen Nachdenken über alte Zeiten. Er findet, dass das Leben damals noch lebenswert war, insbesondere in einem Punkt: der Liebe. Lisbeth kommt dazu und teilt seine Meinung im grossen und ganzen, ist in diesem einen Punkt aber nicht seiner Meinung.

Alwis: Oh mei, datt woore Zeide frieher...

Lisbeth: Watt mennschd, Alwis?

A: Ei Lisbett, dat misschde doch selwer wisse. Frieher wor erschdens alles besser, zwettens allens billicher und drittens worn die Fraaleit schenner.

L: Mennsch du? Unn watt sahste zu dem --- wie heescht datt noch ---ei die ausem Fernsehn. Die Waltraud Schiffer und datt polnische Moddel do. Unn die än schwarzhoorig Schauspillerin, die wo immer Werbung macht for Schminkzeich unn so Sache. Datt sinn doch alles scheen Minscher...

A: Ei joo...awwer lu dich mol hier um. Hier gesiehschde neischt Kratzes. Die Scheene vun geschda sinn aus wie du, unn die jong Mäde laafe rum wie die Bursche, mit kurzer Haar unn erer kodderisch Bux und Stiwwele. Eisch menn! Dat iss doch neischt Scheenes, datt is doch neischt fors Auge.

L: Jo, dat kennt scho stimme, geschda iss ach et Simone, ett kleen Enkelsche vumm Kätt, datt wo jezz uff de höhere Schuul geht, vorbeikumm unn hot ach so e Dingens aan...wie nennt man das...ei so ä Overall und Schuh wie die vunner Stroossenreinigung, also isch menn, et iss jo ä hipsch Mättchen, awwer die Klamodde do missten net sinn. Et vaschandelt sich, awwer wenn de rechts unn links guggscht, siehschde, dass de fascht all so rumlaafe. Vielleischt giwwt et irjendwo ä Preis for de schrohschde Klamodde unn die wolle all grad gewinne. Manschmol froh isch mich jo, wie die jung Bursche nohziehe wolle, wenn die Mäde schon egal gleich rumlaafe, die missde jo dann Dreimeilenstiwwel hann unn Eisenbuxen.

A: Nur mei liew Lissbett, datt stimmt zwar, was de sagscht, awwer isch menn fascht, du muscht do eichentlich nix driwwer sahn mit deiner alden Kiddelschirz...

L: Wat mennscht? Die do iss sehr scheen, silwergrau met Sprenkle, ganz schigges Muschda, und iwwerhaupt trahn isch die Kiddelscherze immer schon unn mindeschdens seit se nimmeh braun sinn.

A: Mei liewes! De Kriech is vorbei!

L: Isch wees! Awwer wennde von frieher vazehlscht, fällt mer halt immer die Zeit enn. Unn do haschde Recht, domols worn die Fraaleit tatsächlich scheener...

A:...weil mir driwwe bei de Franzleit wore unn uns denne ihr Fraaleit angesinn hann statt eich...

L:...unn alles billicher....

A:...weil ett jo egal neischt gab unn dat billichsde wor der Doht im Schitzegrawe...

L:...unn alles besser.

A: Jo! Weil isch noch nit gewusst hann, was späder mol uff misch zukummt. So gesiehn, wor et wierklisch besser, weil ma noch jong unn knachich wor unn all Meeglichkeide gehabt hott.

L: Unn watt hann mer draus gemacht? Alwis, isch menn, es is traurich, ich hätt kenne vill meh aus mir mache.

A: Ach watt, domm Zeich, Lissbett, du hättschd nit meh mache kenne als was de gemacht hascht. Hättschde mehr gemacht, wärschde so gewohr wie dei gudd Schweschda unn irgendwann hätt dat bees Spill ä Enn gehabt, oder du wärscht, statt met demme roden Gerbersch Schang dorchzubrenne, der wo neischt getaucht hat, als beim Maria in da Boudik gebliww unn hättschd späder dat Ganze üwwerholl, awwer dann hättschde heit noch meh Schulde. Nä, nä, isch sahn dir, du hättscht nitt mehr mache kenne, du net, awwer ich...

L: Datt do glaawschde! Du hättschd ach neischt besser mache kenne, du alder Schwätzbeitel, weil de neischt im Kopp gehabt hascht als wie de Weiber und de Zockerei.

A: Gut gesuff hascht vagess. Awwer sonscht stimmt schon, mir hann domols alles metgemacht, weil mer denkt hann, ett kennt jeder Dach der letzschd sinn, un so vakehrt wor das jo ach net. Isch bin kä Naaht vor een Uhr in mei Bett kumm unn isch hatt drei scheener franzeesisch Freindinne gehatt...

L:...ab eens in deinem Kopp, gell? Vazehl mer doch kä Märchjer, du eensamer Hammel wärscht doch froh gewees, du hättschd iwwerhaupt mol än gehatt, bevor ett Babett sisch deiner erbarmt hott.

A: Datt do is net wohr! Isch bin nur scharmanter gewees und mehr diskret als wie dir Fraaleit, die wo ihr gleich alles vazehle misst. Isch hann immer dichtgehall unn keenem was gesagt...

L:...weil et neischt se vazehle gab.

A: Du bischt unn bleiwscht ä alde Unke, alde Krott unn mit neischt zefridde. Wenn isch es doch sahn -- isch hann bloss so gemachd damit die anner Bursche net neidisch werre. Die Wohrheit wor, unn nur wenige hann et drum gewuscht, all Fraaleit hann sisch um misch geriss. Jede hätt isch hann kennen, et Babett wor halt nur hartnäckiger gewees als wie die annere, unn wie de siehscht, sogar die junge Dinger werfen noch ä Aug uff misch, unn datt, wo se mer eichentlich jo gar net gefallen met ihrer kloowiger Schuh unn grosse Buxen. Wei lu grad do hin! Haschde nett dat Kleen do mit denne kurze Blondschopf do gesinn, datt grad do die Stroos riwwergang iss, wie et mir so freindlich gewinkt hott?

L: Jo Alwis, dat woor ä Keerl.

ich gewinkt hott?

L: Jo Alwis, dat woor ä Keerl.